Ina da las emprimas regurdientschas vi da la musica da Deep Purple sajan ils viadis cun auto, din Sven ed Ian Spescha. Lur bab haja fitg savens tadlà las chanzuns da la band da rock englaisa. Ed era tar il bab Balzer Spescha ha l'amur per la band gia cumenzà baud:
Cun 14, 15 onns hai jau emprendì d'enconuscher questa band, senza insumma savair che quai saja Deep Purple.
Quant bel ch'i fiss da pudair far sez questa musica, ha Balzer Spescha pensà. Ed onns pli tard ha el lura fundà la band da tribut ensemen cun ses figls Sven ed Ian. Entant che Ian è il «frontman» vi dal microfon – è Sven l'organist e manader da la band. Agid musical survegnan els dals collegas Marcus Caviezel vi da la ghitarra electrica e da Maic Arpagaus vi dal bass.
Nagina copia ma tuttina datiers
Lur ambiziun na saja betg da copiar las chanzuns da Deep Purple – ma tuttina da laschar tunar ellas uschè datiers sco pussibel a l'original, di Sven Spescha. Quai na saja betg adina uschè simpel, perquai che mintga singul musicist da la band originala ch'è vegnida fundada avant radund 60 onns saja uschè ferm. Che Deep Purple haja anc oz success na fetschia betg smirvegliar el, di il rutinà da la band Balzer Spescha.
Ch'ils Speschas han in spezial ferm liom tar la musica da rock n'è nagin misteri. Ma er il ghitarrist Marcus Caviezel ha gia da giuven ensi gì ina colliaziun tar la band. Il renumà intro respectiv riff da la chanzun «Smoke On The Water» saja ina da las emprimas chaussas ch'el haja savì sunar sin la ghitarra.
Igl ha duvrà temp
Il bassist Maic Arpagaus ha pir propi cumenzà ad amar la musica da Deep Purple cun esser part da la band da tribut. Al cumenzament èsi stà impurtant da pudair far musica ensemen, e suenter haja el lura era gì plaschair vi da las chanzuns sezzas.
Suenter sis onns concerteschan ils tschintg umens la sonda ils 11 da matg en il Cinema Sil Plaz a Glion. E la schanza ch'i vegnia en il futur anc a dar ulteriurs concerts n'è betg pitschna. Uschè ditg ch'els hajan plaschair da far musica ensemen fetschian els quai, era sch'i na vegn in di betg pli a dar la band legendara Deep Purple.
