En l'Artg musical spezial per il venderdi sontg datti musica vocala ed instrumentala adattada per quest di dal patiment e da la suffrientscha da Jesus Cristus, ses truament, sia via cun la crusch fin al crest nua ch'el vegn crucifitgà e nua ch'el mora la finala.
«La Veia dalla crousch»
Questa via da dolur ha Alvin Muoth mess en maletgs musicals e creà uschia l'emprim oratori rumantsch insumma. Ils onns 1992/93 ha il musicist oriund da Razén scrit l'oratori «La Veia dalla crousch» per chor viril, mezzosopran ed orgla. Il text deriva da Peder Cadotsch.
Alvin Muoth lascha reviver en quest oratori maletgs ord si'uffanza, maletgs ed atmosfera dals dis sontgs en baselgia a Razén. La primaudiziun è stada l'avrigl 1994. Il cumponist sez ha dirigì il Chor viril Alvra, la mezzosopranista Stefania Huonder ha chantà il solo e Hans-Peter Tschannen ha accumpagnà a l'orgla. Questa primavaira hai jau pudì discurrer cun Alvin Muoth davart la cumposiziun. El ha er pudì raquintar ina u l'autra reminiscenza ed anecdota en connex cun l'ovra.
«La Veia dalla crousch» cumenza cun il «Pater noster» (babnoss), suandà da la «lamentaschung» (sunada da l'orgla), cuntinuescha lura cun las 14 staziuns da la via da la crusch e va a fin cun il «Miserere mei Deus».
«Improperi del Venerdi Santo»
Er auters cumponists èn s'occupads cun il venderdi sontg. Giovanni Pierluigi di Palestrina per exempel ha scrit l'ovra per chor a cappella «Improperi del Venerdi Santo». En la liturgia catolica èn ils «improperi» ina retscha da responsoris, ina part da la passiun dal Segner il venderdi sontg. Igl è vers ord l'apocalipsa che descrivan las renfatschas che Jesus ha fatg da la crusch anora a ses pievel, ils gidieus. El regorda els a la liberaziun ord l'Egipta cun Moses e ch'els hajan laschà tiers sia crucificaziun.
Il Choeur concinite de Louvain (Belgia) chanta «Improperi del Venerdi Santo» sut la direcziun da Karl Aerts.
«Parsifal»
Er Richard Wagner è s'occupà cun la religiun. En ses gieu festiv «Parsifal» (WWV 111) datti elements religius sco musica solenna, revelaziun da la monstranza, batten e Sontga Tschaina. Igl è stà sia ultima ovra dramatic-musicala ch'el ha cumenzà a scriver il settember 1877. L'avrigl 1879 eran terminadas las skizzas d'orchester per tut ils trais acts da l'ovra. Richard Wagner ha er scrit il text per l'ovra. Ils 26 da fanadur 1882 è stada la primaudiziun a Bayreuth.
Gia pli baud ha Richard Wagner gì l'idea da far pli chapaivel il coc, l'essenza dal religius entras l'art. Qua pia entras l'art da la musica. Ed era quell'ovra è maiestusa, pumpusa e lunga. L'ultima capo-ovra da Wagner dura radund 4,5 uras.
En l'Artg musical datti l'uvertura al gieu festiv «Parsifal» sunà da l'orchester sinfonic da Son Gagl sut la direcziun da Jiri Kout.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
