La situaziun per la populaziun civila a Gaza è catastrofala e vegn adina mendra. La Chadaina da fortuna rimna daners. Sper la guerra en il Proxim Orient è era quella tranter la Russia e l'Ucraina fitg preschenta en la rapportaziun da medias svizras ed uschia er en noss mintgadi. Dentant èn quellas duas guerras per lunsch or betg las unicas che furieschan per il mument.
Var 200 guerras e conflicts en diversas furmas
Quantas guerras ch'i dat per il mument sin il mund è grev da dir, declera Sebastian Ramspeck, il correspundent internaziunal da SRF che rapporta per la televisiun svizra davart politica da segirtad ed economica internaziunala. Sch'ins dumbra ensemen tut las furmas da guerra – da conflicts violents, tensiuns, guerras civilas fin guerras tranter stadis – vegn ins sin var 200. Ed il dumber crescha. Las guerras capitan prest dapertut sin il mund: Etiopia, Myanmar, la guerra da drogas en il Mexico, Sudan – per be numnar inqual conflict. Ellas èn guerras emblidadas – perquai ch'ellas survegnan pauca attenziun. Entant che en spezial duas guerras – quella en la Strivla da Gaza e quella en l'Ucraina èn fitg preschentas en noss mintgadi.
Raschuns pertge che questas guerras èn uschè en il center dettia differentas. Il motiv il pli extrem che pendia ensemen cun l'interess per questas duas guerras saja la segirtad globala. Gist la situaziun en Europa cun la Russia haja il potenzial da s'extender e d'escalar – en il mender cas enfin ad ina guerra atomara. In auter motiv per l'interess specific per las duas guerras menziunadas saja ch'igl è pli simpel da persequitar insatge, sch'ins vegn in pau ordlonder. Quai saja dentant grev en spezial sche las guerras ed ils conflicts èn extrem cumplexs.
Uschia ch'igl è pli simpel da focusar sin quels temas ch'ins ha plitost access, sco las guerras en l'Ucraina ed en la Strivla da Gaza che han er bleras consequenzas directas per la Svizra.
La Svizra è in pajais neutral ed adina cura ch'i dat guerra sa tschentan er per la Svizra bleras dumondas.
Concert: Duai er la Svizra instradar sancziuns encunter la Russia? Duai ins lubir a la Germania la furnir armas svizras a l'Ucraina? Duai dar in scumond da la Hamas? Co statti cun il sustegn per l'ovra d'agid palestinaisa da las Naziuns Unidas? Quai èn tut dumondas che pon evocar dispitas en Svizra dentant er tranter la Svizra ed auters pajais.
Attenziun pervia dals pretschs e fugitivs
Gist la guerra en Ucraina ha er gì per consequenza ch'ils pretschs per bains sco benzin, gas ni graun èn ids ad aut. Ed er l'unda da fugitivs e fugitivas ord l'Ucraina ha fatg fitg preschent questa guerra en Svizra. La tematica da fugitivas e fugitivs para dentant da vegnir percepida different, tut tenor danunder che las persunas arrivan. Uschia che l'interess per ils motivs e la derivanza da las persunas che fugian sur la Mar Mediterrana, para d'esser pli pitschen. E sch'ins serria en quest connex per part sapientivamain ils egls – capitia quai betg exnum ord nauscha veglia, mabain per proteger sasez, manegia Sebastian Ramspeck.
