L'administraziun da taglia dal chantun Grischun dovria probablamain pli ditg quest onn. Las decisiuns davart la taxaziun definitiva sa retardeschian in pau, annunzia il chantun en ina communicaziun a las medias. Quant grond ch'il retard saja, na possian ins betg dir pauschal, ha declerà il manader da l'administraziun chantunala da taglia Angelo Roberto envers il schurnal regiunal da SRF.
Tgi ch'ha gia inoltrà il favrer la taglia sto forsa spetgar 4 fin 5 mais sin la disposiziun da taxaziun definitiva. Tgi ch'inoltrescha la taglia pir la stad sto forsa spetgar 4 fin 5 mais pli ditg ch'usità.
La raschun per ils retards sajan midadas sin meds digitals pli actuals. L'onn 2023 haja l'administraziun midà sin in nov register da taglia, ils onns 2024 e 2025 vegnian pass per pass introducidas novas applicaziuns da decisiuns da taglias. Questas novas applicaziuns stoppian vegnir testadas a moda intensiva e quai dovria temp, declera Roberto Angelo.
Avant ch'ins introducescha ina nova applicaziun sto il persunal testar quella a moda intensiva. La finamira è d'evitar grondas difficultads cura ch'il product vegn propi introducì.
Suenter vegnan meds per persunas giuridicas e taxas spezialas a suandar. Il manaschi ordinari na stettia betg airi, però possia il temp davent dal mument ch'ins inoltreschia la decleraziun da taglia fin ch'in survegn la decisiun definitiva esser pli lung che usità.
