Il chastagner selvadi imposant a l'Obere Plessurstrasse a Cuira è vegnì plantà cura ch'il curtin è vegnì endrizzà enturn l'onn 1850. Uschia ha el var 175 onns, scriva il chantun Grischun en ina communicaziun a las medias. Tar la controlla l'onn passà è vegnì chattà ch'el è infectà da dus bulieus agressivs. I sa tracta dals bulieus kretzschmaria deusta e hallimasch (armillaria mellea). Ils bulieus pon destabilisar la planta. Per quest motiv vegn la tschima tagliada enavos. Tuttina èsi da quintar ch'il chastagner selvadi pireschia en intgins onns cumplainamain.
Pervi dals bulieus n'è la stabilitad betg pli garantida. Quai vul dir che la planta na pudess betg pli tegnair pitg a la chargia chaschunada dal vent.
Quest onn vegn il chastagner selvadi taglià enavos a moda pli massiva, quai n'è però betg l'emprima giada. Sisum en la tschima segireschan sugas che collian differents roms la stabilitad.
Planta marcanta per il maletg da la citad
Per l'ina èn plantas grondas e veglias preziusas per animals pitschens e gronds. Sin il chastagner selvadi amez la citad da Cuira vivan per exempel utschels ed utschels-mezmieur per far igniv respectiv sco stiva. Per l'autra ha la planta da bunamain 25 meters ina muntada per il maletg da la citad.
Pervi da sia vegliadetgna e grondezza è quai ina impurtanta planta per il maletg da la citad da Cuira.
