L'urs sa muventa en Engiadina Bassa. Ils ultims dis hai dà duas cumprovas dad urs. La davosa gievgia è in urs mastgel vegnì en ina trapla fotografica sin il Pass dal Fuorn. E la dumengia ha l'Uffizi da chatscha e pestga chattà fastizs ad Ardez. Quai ha Arno Puorger da l'Uffizi da chatscha e pestga confermà envers RTR.
La surveglianza da chatscha suppona ch'i sa tractia dad in soli animal en la regiun, declera Arno Puorger. Ma cun quai ch'i n'è anc betg cler da tge individi ch'i sa tractia, na po la surveglianza da chatscha betg sclauder dal tuttafatg plirs urs en la regiun.
Ins haja gia avertì ils purs ed apiculturs davart la preschientscha da l'urs. Plinavant sajan ins en contact cun il Tirol dal Sid e cun il Trentino per survegnir eventualmain dapli infos davart l'urs.
Questa cumprova da l'urs è l'emprima cumprova confermada en il Grischun dapi l'atun 2022.
