L'Elektro Bernina AG cun sedia a Madulain è vegnida surpigliada glindesdi da la gruppa Burkhalter. Tar l'interpresa ch'è vegnida fundada il 1997 tutga er ina filiala a Puntraschigna.
Ils possessurs hajan vendì Elektro Bernina en connex cun la regulaziun da la successiun, ha la gruppa Burkhalter ch'è domiciliada a Turitg communitgà glindesdi saira. Tut ils 10 collavuraturs vegnian surpigliads. L'Elektro Bernina fa ina svieuta annuala da radund 2,2 milliuns francs. Ella porschia en l'Engiadina surtut servetschs classics d'electrotecnica, hai gì num en la communicaziun.
L’Elektro Bernina duai vegnir manada ensemen cun la Triulzi AG ch’appartegna gia a Burkhalter ed è domiciliada a San Murezzan. Las interpresas duain vegnir fusiunadas retroactivamain per il prim d’avrigl 2024. Ils dus lieus d’Elektro Bernina vegnan manads vinavant sco filialas da Triulzi.
L'electroinstallatur e tecnicist d'edifizis Burkhalter è quotà a la SIX Swiss Exchange. Ella ha tenor atgnas indicaziuns passa 5'000 emploiads ed emploiadas. Quels èn repartids en Svizra ed en il Liechtenstein sin 158 lieus.
