En il territori da Promulins, a l’ur da Samedan, posseda la vischnanca burgaisa bun 10'000 meters quadrats terren da construcziun. Sin quels duain vegnir realisadas radund 70 abitaziuns. Suenter avair approvà il december 2022 in credit da projectaziun sur 550’000 francs ha ina concurrenza d’architectura evaluà co ch’il project duai vesair ora.
La finamira da la vischnanca burgaisa da Samedan è da realisar lieu d’abitar pajabel per indigens. Quai na va però uschè svelt, i vul pazienza.
Cun il project «Palü» ha il team d’architects Stücheli Pestalozzi Schiratzki da Turitg pudì persvader il meglier la giuria da las 27 ideas inoltradas e gudagnar la concurrenza d’architectura.
Il project victur, ina surfabricaziun cun trais bajetgs mintgamai sin quatter auzadas, duai esser la basa per planisar ils proxims pass. Prevesidas èn abitaziuns da differentas grondezzas adina en duas differentas variantas, ina standard ed ina pli economica.
Il pretsch d’in’abitaziun sa lascha reglar il pli ferm sur ils meters quadrats per testa.
La vischnanca burgaisa da Samedan vuless avair en maun ils frandaivels uschè ditg sco pussibel tar il project che vegn a custar tranter 40 e 43 milliuns francs. Prevesì saja perquai da furmar la basa legala, tut tenor cun ina cooperativa, uschia Dumeng Clavuot.
Fin la fin dal 2024 duai il plan da quartier Promulins vegnir approvà da la vischnanca. La finamira saja d’inoltrar in onn pli tard la dumonda da construcziun e cumenzar il 2026 cun la realisaziun. Sche tut va tenor plan, avessan las emprimas abitaziuns dad esser prontas per la fin dal 2028.
