Dapi la primavaira da l’onn passà sanescha la Viafier retica ils dus tunnels tranter Brail e Zernez, il tunnel Brail I e Brail II. Ils tunnels sajan vegnids en ils onns e na correspundian betg pli a las pretaisas d’ozendi, perquai dovria sanaziuns, uschia Urs Tanner, il mainaproject da la Viafier retica. Pli aut e pli lad vegnan ils tunnels ad esser ed els survegnan in nov binari cun in sistem innovativ, sviluppà da la Viafier retica.
Construcziun d’elements
Numnadamain vegn remplazzà l’entir fundament dals binaris. Empè da fundament da glera sco usità, datti fundament da plattas spezialas da betun. Elements da 2,5 tonnas ed ina lunghezza dad 1,65 meters. Quai correspunda a trais traversas per element. Quai è lavur da pionier da la Viafier retica. Il grond avantatg da quests novs binaris saja lur durada, uschia Tanner. Quint fetschian ins cun ina durada da var 50 onns. Vinavant possian ins spargnar 24 secundas viadi. La construcziun da quest nov binari è ina lavur da precisiun sin millimeters. Numnadamain sto mintga fixaziun da la rodaglia esser montada sin millimeters precis.
In decenni lavurs da sanaziun
Las lavurs da sanaziun dal tunnel Brail II cun sia lunghezza da 308 meters duain esser a fin l’onn 2026 e custar var 25 milliuns francs. Suenter cumenza la renovaziun dal tunnel Brail I – ch'è var 800 meters lung. L’onn 2032 duain lura esser terminadas tut las lavurs dals dus tunnels.
