Il lieu Brinzauls ed era las abitantas ed ils abitants eran in grond tema en las medias. Adina puspè sa han midadas las fasas, pia da mellen sin oransch, cotschen u blau. Tar la fasa oranscha aveva la vischnanca da vegnir evacuada. In mais pli tard, mez da fanadur è la bova alura vegnida durant la notg. Ils abitants e las abitantas pudevan dentant pir turnar intginas emnas pli tard. La normalitad saja turnada spert. Elisabeth Arpagaus di cunzunt, ch’ella ha baud gia emblidà ch’ella saja stada davent. Ma il vegnir enavos saja stà pesant.
Sco emprim eri fitg trist. I n'aveva naginas fluras vi da las fanestras ed il santeri era tut sitg – sco mort ora. Uss viva dentant tut puspè.
L’abitanta metta uss puspè ora flurs davant chasa e fa ses curtin. Ella n'haja nagina tema da la crappa che vegnia anc adina giu dal grip.
La vischnanca sa mova
Il pur, Gian Liesch è cuntent ch'el ed ils animals èn puspè enavos, dentant na sappia el betg emblidar tge ch’è tut capità enturn l’evacuaziun. El na ha betg tema da la crappa, ma dal patratg da vegnir evacuà danovamain. El vesa en il terrain adina puspè sfessas che sa furman atras il moviment da la vischnanca. Ella sa mova cun ina sveltezza da dus meters per onn. Il grip sur Brinzauls sa mova nov meters per onn. Ils responsabels dian che quai saja spert, dentant betg alarmant.
Renato Liesch, ch’è creschì si a Brinzauls, sa regorda dal prà sut sia chasa ch’era pli baud in prà guliv. Uss sa sbassa quest prà, la plazza da giugar da l’autra vart è uss intgins meters pli en giu. A sia chasa che stat sin betun bada el ina tensiun atras il moviment. Numnadamain rumpa tranteren ina platta en chasa. Ma el di, ch’el saja creschì si là e ch’ins ha da viver cun quai.
