I dettia differents bajetgs che sajan serrads e vids sco per exempel il hotel Cube a Savognin. Er sajan differents novs projects boccads pervia da recurs che sajan per part ids fin avant dertgira federala. Tanja Amacher, la directura da la Turissem Savognin Bivio Albula SA di ch'i duvrass dapli letgs chauds en il Surses. Il pensum da l'organisaziun turistica saja, da far marketing per la regiun da vacanzas e la communicaziun. Sch'ins fetschia marketing e raquintia quant bel ch'i saja en questa regiun da vacanzas, lura tutgia er vitiers che la glieud possia star insanua sur notg e sa sentir bain. Ella haja adina in zic il sentiment ch'ins fetschia dus pass enavant e lura puspè in enavos e quai fetschia mal. La situaziun en l'hotellaria e la gastronomia a Savognin saja difficila di la directura da l'organisaziun turistica.
Hotel Cube a Savognin
Pliras giadas ha RTR contactà Rudolf Tucek, il manader da la S1 Hotelerrichtungs SA che posseda l'hotel. Quai dentant senza success. Uschia èsi impussibel d’eruir, sch’ina reavertura da l'hotel è planisada u betg. Concurs n’è l'hotel dentant betg ì, sco quai che l’uffizi da concurs Alvra ha ditg sin dumonda dad RTR. Divers cas da dretgira èn dentant pendents il mument. Quai conferman las Pendicularas da Savognin SA. Sco quai che la Dretgira regiunala Alvra a Casti ha confermà, sajan averts trais cas nua ch’i giaja per daners. Tut tenor las pendenzas ch’i dettia, vegnan quels tractads anc quest onn, ha la dretgira ditg sin dumonda.
Serrà gia avant la pandemia
Gia avant la pandemia da corona è l'hotel Cube stà serrà in temp. Il settember 2018 è quai capità surprendentamain. Lura avevi gì num davart da l'investur austriac ch'il motiv sajan opiniuns differentas tranter l'hotel e la vischnanca sco era conflicts cun las pendicularas. Il schaner 2020 aveva l'hotel lura festivà sia reavertura, la pandemia ha dentant pli tard puspè franà il manaschi.
L'hotel Cube ha 270 letgs ed era vegnì avert l'onn 2005. A Savognin n'è il Cube betg il sulet hotel cun portas serradas, pervia da problems da chattar ustier u ustiera è er l'hotel Arlos serrà.
