Oriunda è Tanja Amacher che ha 55 onns da Horgen en il chantun Turitg. Gia avant ch'ella aveva surpiglià il post a la testa da l'organisaziun turistica, passentava ella regularmain ses temp liber en il Surses. Ella è colliada fermamain cun la regiun – quai betg il davos grazia a ses um ch'aveva in'abitaziun da vacanzas en il Surses.
Jau ma sun immediatamain inamurada en questa regiun da vacanzas.
Sch'ella recapitulescha il lung temp sco directura da l'organisaziun turistica datti varsaquants muments legraivels ch'ella po sa regurdar. Il «Donnschtig-Jass» sin la plazza vischnanca a Savognin il 2018 è per exempel restà en fitg buna memoria. Quest'occurrenza gronda saja stada ina gronda chaussa per la regiun. Era da la realisaziun da la senda tematica da la vita d'alp tranter Somtgant e Radons ch'è vegnida averta il 2019 è ella loscha.
Quai che resta il pli fitg èn ils inscunters cun differentas persunas interessantas qua en la val e la collavuraziun cun il stupent team che nus avain.
Tanja Amacher accentuescha ch'ella haja in super team. Mintgin e mintgina dettia di per di ses meglier e mintga singul vegnia a lavurar cun grond engaschi e passiun. Ella suletta na possia betg muventar la massa, perquai saja il pli impurtant che la collavuraziun funcziuneschia.
Sa chapescha ch'i dettia er adina puspè chaussas che na plaschian betg adina a tuts ed a tuttas medem bain. E quai sentian ins lura er. Ma per quai saja ella a la testa da l'organisaziun, per tegnair vi la testa la finala. Magari sajan quai chaussas che na sajan betg uschè bellas: saja quai messadis u telefons nauschs u magari vegnia ella era pledentada sin via. Ma uschè ditg ch'il positiv predomineschia, possia era magari vertir chaussas negativas u che na fetschian betg tant plaschair.
Per Tanja Amacher datti definitivamain dapli positiv che negativ. Ella saja cuntenta cun sia lavur e la vita en il Surses. In grond cletg saja er che ses um haja medemamain fatg ragischs en la regiun. Tge che la vita portia anc, na sappia nagin. Ma actualmain na vuless ella midar nagut ni vi da sia situaziun ni vi da sia posiziun.
La schanza che jau rest fin mia pensiun è avant maun.
