La tscherna professiunala è in dals emprims pass impurtants en la vita d’in giuvenil. En l’internet datti bleras purschidas per chattar la dretga clamada, ma en la lingua rumantscha na datti betg bleras. Quai vul l’interpresa Profolio, ina pitschna interpresa privata, midar ed ha translatà la purschida digitala e per las scolas en rumantsch sursilvan.
Nus vulain ch’ils giuvenils pon siemiar e siemiar è il meglier pussaivel en la lingua dal cor, la lingua mamma.
Simon Schmid maina l’interpresa ch’è vegnida fundada avant 40 onns da ses bab en segunda generaziun ed ha introducì las purschidas digitalas, sco era professiunalisà ils meds d’instrucziun. Durant ina visita en l’Engiadina ha Simon Schmid discussiunà cun auters cussegliaders da professiun sur da la situaziun dal rumantsch e la finala ha el decis da translatar il med d’instrucziun en la quarta lingua naziunala.
Chantun ha l’emprim betg vulì traducziun per rumantsch
L’emprim ha il chantun betg vulì, ma cun in concept e l’agid da la Lia Rumantscha è la finala sa cristallisà ora ch’il med d’instrucziun professiunala duai vegnir translatà ina giada per sursilvan. Quai è uss succedì e la tschertga da partenaris, vul dir scolas, è impurtanta, pertge in med d’instrucziun dovra scolas che nizzegian el, di Simon Schmid. Perquai haja el era visità la conferenza da scolastas e scolasts rumantschs a Glion, nua che l’interess è grond per la purschida. Uss è era planisà ina segunda scuntrada per tuts interessads a Trun ils 12 da zercladur, nua che la purschida rumantscha vegn mussada e nua che quai dat ina instrucziun per tuts interessads, di Simon Schmid.