A Sursaissa è in um vegnì chattà mort ier saira en in tumbin. Enturn las nov la saira han collegas da lavur survegnì infurmaziuns e chattà el pli tard cun il chau oravant en in tumbin a Zarzana. Els hajan tratg ora l'um da 45 onns e cumenzà cun emprim agid – pli tard ha alura il servetsch da salvament Surselva cuntinuà, dentant stuì chalar. Tenor la polizia ha il servetsch da salvament declerà l'um «mort sin il plaz».
In accident da lavur para tenor il stadi actual da las enconuschientschas plausibel.
Daco che l'um è mort e cura, na saja il mument betg cler, ha declerà in pledader da la polizia chantunala sin dumonda da l'agentura da novitads Keystone-SDA. La polizia investighescha en tuttas direcziuns, in effect da terz n'haja dentant betg prioritad. L'um haja fatg lavurs al lieu d'accident. Tenor las enconuschientschas actualas saja in accident da lavur plausibel.
La polizia e la procura publica intercurescha il cas.
