Cun 64 onns s’accumplescha Claudio Gregori in pitschen siemi. Chaminar cun in asen tras la champagna, senza squitsch da temp, senza plan. Simplamain ir e giudair. Dapi onns ha il pastur e president da bio Grischun gì l’idea da far quai – uss èsi uschè lunsch. Dapi trais mais ha el preparà il viadi, ha chattà in asen da trekking en la Val Müstair ch’el ha pudì emprestar per sia aventura. Ina sfida vegnia gia be cun quai ch’el ha stuì laschar operar ses dus schanugls avant tschintg mais ed è anc adina vi dal sa revegnir. Ma cun quai ch’el n'ha betg planisà rutas ed etappas po el prender tut patgific.
Cun camiunetta fin giudim il stival da l’Italia
Enstagl da partir davent da chasa va el cun ses asen bundant 1'500 kilometers en il sid, fin giudim la Calabria. Cun quai ch’il pastur passiunà vul esser da return per l’entschatta da la stagiun d’alp ed era perquai ch’el vuleva gia daditg emprender ad enconuscher quella regiun, cumenza el ses viadi cun laschar transportar ad el ed a l’asen Armani cun ina camiunetta. Copilot è Reto Raselli che returna lura puspè cun la camiunetta.