La banca gronda svizra scriva l'emprim quartal da quest da novamain cifras nairas – quai suenter dus quartals cun perditas. Il gudogn munta a passa 1,7 milliardas dollars, sco la banca scriva. Quest emprim quartal dal 2024 è il terz quartal nua che la CS è vegnida cumpigliada cumplainamain el quint.
Avant circa in onn han ins supplitgà nus da sustegnair la stabilisaziun dal sistem svizzer e global cun l'integraziun da la CS. Nus avain pudì tegnair questa empermischun.
Cun quai gudogn ha la banca surpassà cleramain las prognosas. L'onn passà aveva la banca in gudogn da 1,03 milliardas – quai senza l'integraziun da la Credit Suisse. Pervi da l'integraziun da la CS en il segund quartal da l'onn passà era il gudogn contabilitar explodì sin bunamain 30 milliardas. Quai ha silsuenter manà a las perditas en il terz sco er el davos quartal dal 2023.
Gudogn fa crescher la valur da las aczias per 9%
Las cifras nairas da l'UBS han er in effect immediat sin las aczias: quellas han augmentà lur valur per prest 9%. Quai suenter che la banca gronda ha communitgà las cifras da l'emprim quartal: In gudogn schuber da prest 1,6 milliardas francs – bler pli grond pia che quai ch'analistas ed analists avevan prognostitgà.
L'integraziun cuntinuescha svelt
Gia la fin matg vul l'UBS far l'ultim pass impurtant en connex cun l'integraziun da la CS: Las partiziuns giuridicas «UBS AG» e «Credit Suisse AG» èn anc adina separadas. Quellas duain vegnir reunidas cumplettamain sin fin matg.