La Credit Suisse è vegnida fundada 1856 d'Alfred Escher. Ella ha tutgà tar ina da las 30 bancas internaziunalas relevantas dal sistem. La fin da la Credit Suisse è stada ils 19 da mars 2023. Lura ha il Cussegl federal decidì la surpigliada sfurzada da la Credit Suisse.
La cronologia dals eveniments
- La mesemna avant ha il curs d'aczias da la banca cuntanschì 1,55 francs (2007 è qual anc stà sur 90 francs). La clientella retira milliardas da ses contos.
- La gievgia annunzia la CS ch'ella dovria 50 milliardas francs da la Banca naziunala svizra sco agid d'urgenza.
- Dumengia preschenta il Cussegl federal ses plan da la surpigliada tras l'UBS ch'el ha intermedià. Ella duai pajar trais milliardas francs per l'entira fatschenta da la CS. Plinavant han la Confederaziun e la Banca naziunala dà garanzias da liquiditad da 200 milliardas francs.
Legenda:
Represchentants da l'UBS sin via en il Departament federal da finanzas la dumengia, ils 19 da mars 2023
Keystone
- Ils 11 ed ils 12 d'avrigl ha il parlament fatg ina sessiun extraordinaria davart questas garanzias. Il Cussegl naziunal refusa d'approvar las garanzias, quai n'ha dentant gì nagin effect.
- L'Assamblea federala decida ch'ina cumissiun parlamentara d'inquisiziun duai «intercurir la gestiun da las autoritads en connex cun la fusiun d'urgenza».
Legenda:
Cussegliera federala Karin Keller-Suter avant il Cussegl naziunal.
Keystone
- Ils 11 d'avust di l'UBS da desister da la garanzia statala. La ministra da finanzas Karin Keller-Suter di ch'il pajataglia e la pajataglia na portian nagina ristga pli a partir da quel di.
- L'UBS preschenta la fin da l'avust l'emprima giada las cifras suenter la fusiun. Ella fa in gudogn da record en l'emprima mesadad dal 2023 da 28,9 milliardas francs. Plinavant annunzia ella da betg tegnair il num Credit Suisse pli, e ch'i vegn a dar relaschadas.
Legenda:
SRF
La seria da podcast «Das Ende der Credit Suisse» da SRF illuminescha tge ch’è capità davos las culissas tar la surpigliada tras l’UBS: sesidas da crisa cun la cussegliera federala Karin Keller-Sutter, stgatlas da pizzas en il departament da finanzas ed il carussel d'emoziuns da collavuraturas e collavuraturs da la CS.