Cussegl federal - Augmentar il dumber da persunas tar la protecziun civila

Cun differentas mesiras vul il Cussegl federal cumbatter la mancanza da persunal tar la protecziun civila. Per quai duai vegnir adattada la lescha davart la protecziun civila. Persunas ch'èn obligadas da far servetsch militar – e n'han enfin il 25avel onn da vegliadetgna betg fatg la scola da recruts – duajan da nov esser obligadas al servetsch da protecziun civila. Il medem duai valair per persunas che vegnian decleradas nunadattadas per il servetsch militar suenter la scola da recruts. Sche questa mesira na tanscha betg duajan era persunas che fan servetsch civil vegnir obligadas a la protecziun civila. Sco proxim tracta il parlament la midada da lescha.