Mintg’onn il medem maletg: las colonnas da Pasca. Cunzunt al Gottard vegn era quest onn puspè spetgà ad in spetgar. Betg ch’ins fiss insè betg perdert avunda – gist sco tar il viadi quotidian a la lavur. Mo che lez sa lascha evitar bler mender ch'in viadi en il Tessin en il temp da truscha.
Ma i dat ideas co che las colonnas pon vegnir evitadas resp. reducidas:
Sistem digital da reservaziun
Il chantun Uri emprova da dar dumogn a las colonnas en il sid cun ina sort «sistem da slots». Per quel hai dà l'onn passà glisch verda dal parlament chantunal. L'idea è che viagiaturs reservan via ina plattafurma digitala lur passagi tras il tunnel durant in tschert temp. Tgi che arriva senza reservaziun al Gottard sto parcar e spetgar fin ch'el è en roda.
In sistem che na po en il sid dal tunnel betg persvader tuts – tant en il Tessin sco en il Grischun.
Taxa dal Gottard
Ins pudess era regular il passagi tras il tunnel cun ina taxa che vegniss pli chara durant las uras principalas dal traffic. Ina proposta ch'è gia vegnida fatga pliras giadas e ch'è l'onn passà puspè vegnida si.
Era qua datti opposiziun dals chantuns dal sid. En il Tessin teman insaquants in dischavantatg economic e social dal chantun. En il Grischun fan ins quitads che la taxa pudess effectuar in augment dal traffic sin l’axa dal San Bernardino. Auters sa dumondan, schebain la taxa saja cumpatibla cun las cunvegnas bilateralas cun la UE.
Engrondir las autostradas
L'A1 duai vegnir schlargiada sin 6 vials en posts neuralgics. Uschia ha decidì il parlament. Quai correspunda er a la strategia a lunga vista dal Cussegl federal. Cunter quests plans d'engrondiment è dentant sa furmada opposiziun. Il schaner ha l'allianza «Stop a la construcziun d'autostrada» inoltrà in referendum a la chanzlia federala. Ina votaziun dal pievel vegn spetgada per l'atun 2024. L'allianza sa cumpona da 29 organisaziuns, federaziuns e partidas e vegn manada dal VCS sco era da l'organisaziun per l'ambient che s'engascha en la politica dal traffic «Umverkehr».
Simulaziun da colonnas davant vitgs
En il Grischun han ins tschernì in’autra via. Perquai che bleras automobilistas e blers automobilists guntgeschan tar colonnas sin la A13 mintgamai en ils vitgs, ha quai chaschunà traffic supplementar en las vischnancas – ed era dapli malruaus. Per evitar quai ha l’uffizi da construcziun bassa decidì da fermar il traffic davant ils vitgs mintgamai per duas minutas e suenter puspè laschar passar 40 autos. Quai ha per consequenza ch'ils apparats da navigaziun na proponan betg a las automobilistas ed als automobilists sin l'A13 da guntgir via la via chantunala.
Parallelamain vegn la sveltezza maximala sin l'A13 reducida per part en omaduas direcziuns. Uschia duai il traffic vegnir armonisà e la capacitad da la A13 vegnir nizzegiada meglier
Tenor ils responsabels saja il nov sistem sa cumprovà.
