14 persunas èn fin uss mortas en lavinas quest enviern. La mesadad da quellas en il Grischun. Quai mussa la bilantscha provisorica da l'Institut federal per la perscrutaziun da naiv e lavinas, SLF a Tavau.
In lavurer è mort en ina chava da crappa e tar in accident è in skiunz vegnì sutterrà sin ina pista averta. Tschellas 12 persunas sajan tenor il SLF vegnids sut lavinas en territoris betg segirads.
Il dumber da morts quest enviern saja dentant sut la media dals ultims onns, lezza è tar 17 persunas. Quai malgrà che surproporziunalmain bleras persunas sajan vegnidas sut ina lavina quest enviern, en tut passa 190 persunas. Il SLF survegna dentant er adina pli savens annunzias da lavinas pitschnas. En general saja quest enviern stà fitg miaivel.