Radund 800 portgs èn morts – quai pervia d'in incendi d'ina tratga da portgs a Gossau, chantun San Gagl. Quai communitgescha la Polizia chantunala da San Gagl. Persunas blessadas n'haja dà naginas.
Il fieu aveva cummenzà il suentermezdi da la mesemna, ils 8 da matg, vers las 17:00. El ha tschiffà duas stallas cun en tut radund 1'500 portgs. Tenor la polizia haja il fieu cumenzà en la stalla pli gronda – circa las 18:00 era il fieu d'ina da las duas stallas sut controlla.
Ils pumpiers han gì bregia da stizzar il fieu
Pervi da mancanza d'aua era la lavur dals pumpiers difficila. Igl han stuì metter lingias per obtegnair l'aua da stizzar ch'igl ha duvrà.
Ina stalla è brischada cumplettamain, l'autra han las forzas d'intervenziun al lieu pudì proteger dal fieu. Ils portgs eran exponì a fermas fimeras. Grazia a maschinas dals pumpiers – ch'han procurà per aria frestga en questa stalla – han radund 90 portgas e 600 purschels survivì. Plirs veterinaris eran là per dar sustegn a la polizia ed als pumpiers.
