El n'haja betg simplamain vulì mo star da la vart, mabain sez vegnir activ, di Flurin Andry. Ed uschia è l’um da 29 onns sa fatschentà cun il marxissem e quella teoria haja persvas el. Dapi circa set onns è el ussa tar l'IMT, la International Marxist Tendency, ina gruppaziun communista che derasa l’ideologia marxistica en passa 40 pajais e che fundescha questa fin d’emna la Partida communista revoluziunara RKP. Lur finamira – la revoluziun.
Cuntanscher la regenza da la classa da lavurantas e lavurants vulan ils revoluziunaris professiunals betg exnum cun gudagnar elecziuns mabain cun mobilisar las massas. La democrazia saja mo in’illusiun. Las persunas che decidan propi sajan las bancas ed ils concerns.
L'ideologia marxistica è antidemocratica
Da metter en dumonda la legitimitad dal sistem democratic, quai saja tipic per tals moviments antidemocratics, constatescha Felix Neumann. Gist il fatg che la Partida communista revoluziunara po vegnir fundada mussia che la Svizra saja ina democrazia reala, di l’expert per il cumbat cunter extremissem e terrorissem da la fundaziun Konrad Adenauer a Berlin. Sche la Svizra fiss propi ina dictatura fissan las aderentas ed ils aderents da la RKP en praschun.
I saja plitost in cuntrari. Quai che Lenin haja numnà la vaira democrazia n'haja da far nagut cun ils dretgs umans ed elecziuns libras e gistas sco quai che nus enconuschain. Finamira saja, quai scrivia era Lenin en ses texts, da derscher il stadi e sias instituziuns e d’eriger sin las ruinas in sistem cun cussegls locals e regiunals sut la controlla da la partida communistica che mainia il stadi a moda centralistica.
A l'ur sanester dal spectrum politic
Expropriar las bancas ed ils concerns gronds, in'economia planisada e la fin dal chapitalissem. Per Hans-Peter Schaub, politolog tar l’Année Politique Suisse da l’universitad Berna è cler; cun talas finamiras sa posiziunescha la Partida communista revoluziunara en il chantun tut sanester dal spectrum politic da la Svizra.
Partidas cun ideologia marxistica haja adina puspè dà en Svizra. La Partida communista revoluziunara vesa Schaub en la tradiziun da la Lia marxistica revoluziunara ch’è sa schliada ils onns 90 dal davos tschientaner. Sco la RKP oz, veseva ella sa sezza sco opposiziun ordaifer il sistem parlamentari. Hans-Peter Schaub na crai betg che la Partida communista revoluziunara vegn a pudair mobilisar las grondas massas. La nischa politica en la quala ella sa muventia saja pulit pitschna.
