La guerra en il Proxim Orient ha chaschunà in'unda da reclamaziuns pervi dad emissiuns ed artitgels online dad SRF. Aifer dus mais haja dà 80 contestaziuns, ha communitgà la mediaziun da la SRG Svizra tudestga. Gnanc durant la pandemia da Corona haja dà tantas reclamaziuns aifer dus mais sco suenter ils schabetgs dals 7 d'october 2023, uschia statti en il rapport annual dal 2023 dal post da mediaziun.
Il post da mediaziun crititgescha il tun da bleras persunas che recloman. Els sajan adina puspè stads schoccads dal vocabulari e da las pretensiuns en las reclamaziun. Per exempel saja SRF vegnì fatg cunresponsabel che persunas gidieus vegnan attatgadas pli savens antisemiticamain – u era che SRF sustegnia il genocidi ed il regime d'apartheid da l'Israel.
Clima e luf èn ulteriurs temas
Sper il conflict en il Proxim Orient èn era vinavant ils temas clima, il luf, la PPS u corona motiv per reclamaziuns. Betg pli in problem è la lingua neutrala areguard ils genders – persuenter vegnia pli savens reclamà sch'ins laschia davent la furma feminina. Ins haja survegnì ina reclamaziun ch'ins haja be menziunà «purs» e laschà davent «puras».
En total ha il post survegnì passa 800 reclamaziuns l'onn passà. 35 da quellas èn vegnidas approvadas per part u cumplainamain.
