El vul far quai cun ina nova lescha federala sur da las cundiziuns da lavur en il sectur da tgira, ha communitgà il Cussegl federal.
Quai èn las mesiras proponidas:
- Las persunas da tgira duajan da princip survegnir almain 4 emnas ordavant ils plans da lavur.
- Reducir il temp da lavur maximal per emna dad oz 50 sin nov 45 uras.
- La quantitad dal temp regular da lavur duai muntar a 28 fin 42 uras per emna.
Uschia vul il Cussegl federal proteger la sanadad da las persunas da tgira. Tut en tut ha la regenza cun questa lescha la finamira che las tgirunzas ed ils tgirunzs restian pli ditg en la professiun. Il sboz dal decret che cumpiglia ulteriuras mesiras va en consultaziun fin la fin d'avust.
Emprima etappa da la realisaziun da l'iniziativa cumenza
Cun l'emprima etappa da la realisaziun da l'iniziativa da tgira vulan la Confederaziun ed ils chantuns vegnir a dapli spezialistas e spezialists da tgira en Svizra. L'emprima etappa consista perquai d'ina offensiva da scolaziun. Quella cumenza il fanadur da quest onn e consista da trais parts.
Sco emprim sustegnan ils chantuns finanzialmain ils ospitals, las chasas da tgira e las organisaziuns da spitex che porschan plazzas da scolaziun praticas per spezialists da tgira diplomads. Secundo pon els sustegnair finanzialmain, en cas da basegn, persunas che absolvan ina scolaziun da tgira en ina scola auta professiunala u en ina scola spezialisada superiura. Terzo survegnan las scolas autas spezialisadas e las scolas spezialisadas superiuras in supplement per stgaffir plazzas da furmaziun supplementaras.
