Per tge vai: Sco ina retschertga da RSI mussa, dovran l'Uffizi federal da polizia (fedpol) sco er l'Uffizi federal da l'armament (armasuisse) ina software russa. Cun la software pon ins decodar e reconstruir pleds clavs sin smartphones e sin computers. En vista als ultims cas da spiunadi ch'han in connex cun la Russia sa tschenta la dumonda d'ina largia da segirezza relevanta.
L'interpresa russa: Il producider da software Elcomsoft stat a disposiziun sco partenari per autoritads d'investigaziun, sco partenari da clients commerzials ed er privats. La purschida ch'è descritta sin la pagina d'internet tanscha da «soluziuns d'extracziun da datas» fin a «tools per forensica mobila». Sin la pagina d'internet ch'è cuntanschibla da la Svizra vegn inditgà Prag en Tschechia sco domicil d'interpresa. Retschertgas pli exactas, tranter auter cun reconstruir versiuns pli veglias da la pagina d'internet, han però mussà insatge auter: La sedia principala da l'interpresa sa chatta a Moscau. Questa adressa sco er l'infurmaziun davart la giurisdicziun russa è vegnida stritgada da la website suenter l'invasiun da la Russia en l'Ucraina l'onn 2022. Ma er il register da commerzi russ renviescha a l'activitad a Moscau.
Avis d'expert per protecziun da datas: Per Sébastien Fanti, fin avant pauc temp incumbensà per la protecziun da datas dal chantun Vallais ed expert da tecnologia, chaschuna l'applicaziun da la software serius dubis envers la segirezza naziunala da cyber. «I sa tracta d'ina interpresa ch'è suttamessa al dretg russ», uschia Fanti. Quai veglia dir che las autoritads ed ils servetschs d'infurmaziun a Moscau avessan potenzialmain access a las lavurs nua che la software vegn duvrada. «Tge garantescha ch'i na dat nagina «porta davos»? Nagut.» Perquai che talas «portas secretas» vegnan savens installadas tenor standard - er per intents da mantegniment - duess la tscherna tenor Fanti crudar sin in «partenari» che lavura en in pajais cun reglas democraticas e cun in bun stadi da dretg. «Quai n'è betg il cas tar la Russia.» Per l'expert Fanti è questa software da surveglianza «in'arma. E sco tala duess ella era vegnir tractada.»
Posiziun da fedpol ed armasuisse: Sin la pagina d'internet dal purschider da software figureschan er fedpol ed armasuisse tranter la clientella. Armasuisse ha confermà en scrit d'avair retratg la software «per intents da test». Detagls davart l'applicaziun n'èn betg vegnids numnads. Il fedpol ha l'emprim refusà da respunder, quai per motivs da segirtad. Suenter avair dumandà suenter intginas giadas – a basa da la lescha da transparenza – ha l'uffizi confermà d'avair acquistà l'onn 2024 licenzas per quatter products da la firma Elcomsoft. Questas vegnian dentant duvradas be offline, quai vul dir senza colliaziun cun la rait.
Reacziun ord la Chasa federala: Per Gerhard Andrey, cusseglier naziunal dals verds, commember da la Cumissiun per la politica da segirezza ed informaticher, èsi in problem «sche las autoritads svizras èn memia dependentas dad utensils e firmas da l'exteriur ch'han lur sedia en pajais problematics per nus – sco per exempel la Russia u la China.» En connex cun la capacitad da la software numnada saja quai «fitg delicat». Il fatg che la software vegniss duvrada offline n'è per Andrey betg equivalent cun ina segirtad da 100%. Uschia dettia quai evidentamain era actualisaziuns.
