Las annunzias davart cugliunarias en l'internet en la segunda mesadad dal 2023 èn bunamain dubel uschè autas sco durant il medem temp da l'onn avant.
Sco quai che l'Uffizi federal per la segirezza digitala scriva, haja cunzunt dà bleras cugliunarias cun inserats da plazzas. Ultra da quai hajan bleras persunas annunzià d'avair survegnì telefons da persunas ch'hajan pretendì d'esser la polizia.
30'331 annunzias davart incidents da cyber sajan entradas durant il segund semester da l'onn sur il formular d'annunzia uffizial tar il Center naziunal per la segirezza digitala (NCSC), cumpareglià cun 16'951 durant la medema perioda da l'onn passà, hai gì num en ina communicaziun a las medias dal glindesdi.
Il dumber da las annunzias cun donns s'augmenta en media per 30% per onn. L'uffizi federal ha elavurà l'onn passà en tut 187'000 annunzias sur la pagina d'internet antiphishing.ch ed ha prendì ord funcziun 8'223 paginas d'internet en Svizra che vegnivan utilisadas per phishing.
