Il Cusseglier federal Albert Rösti crititgescha en la «Samstagsrundschau» da SRF il Tribunal europeic dals dretgs umans. Quel aveva l'entschatta avrigl decidi che la Svizra fetschia memia pauc en il cumbat cunter la midada dal clima. Rösti vesia entras questa sentenzia in conflict cun la democrazia directa.
Co è quai cumpatibel sche la dretgira di ch'i saja memia pauc, e la populaziun ha decidì nus na vulain per il mument betg dapli?
Il tribunal europeic dals dretgs umans haja betg risguardà las decisiuns tratgas en Svizra a l'urna. Concret manegia Rösti la lescha da CO₂ ch'è vegnida refusada il 2021. Quella avess era previs ina taxa sin bigliets per sgular. Plinavant haja il parlament federal fatg ina revisiun d'ina lescha da CO₂. Er quai n'haja il tribunal betg resguardà.
Il Cussegl federal analiseschia la decisiun dal Tribunal europeic dals dretgs umans. Co e scha ch'il gremi reagescha sin quel na saja anc betg cler.
Svizra fetgia avunda
Sin la dumona sche la Svizra fetschia propi memia pauc, di il minister d'ambient cler: na. Persunalmain na vesa el nagin ulteriur basegn d'agir en la politica da clima.
La Svizra è sin buna via – qua n'è nagut sa midà vid mia posiziun
Nagin auter pajais haja decidì a l'urna da daventar neutral al clima fin l'onn 2050. Plinavant fa el attent sin la nova lescha per la protecziun da clima che dat avant ils pass da reducziun fin là.
