Quai declera Marcel Zumbühl, responsabel per la segirtad d'infurmaziuns tar la Posta uschia: Sche clientas e clients vegnan contactads da la Posta para quai fidaivel. Cunzunt per quels ch'empostan savens rauba online. Per distinguer in e-mail da la Posta dad ina cugliunaria inditgescha la Posta plirs indizis:
- La Posta na dumonda mai infurmaziuns sco pleds clav u datas da cartas da credit per e-mail, sms ubain telefon.
- Sch'ins vegn contactà nunspetgadamain è quai suspectus.
- Mails uffizials da la Posta vegnan adina tramess da notifications@post.ch. Il speditur dal mail pon ils cugliuns surscriver, la dretga adressa vegn dentant mussada sch'ins va cun il punctader da la mieur sur l'adressa dal speditur senza cliccar.
- La Posta trametta be mails cun titulaziun correcta sco «Sehr geehrte Frau» u «Sehr geehrter Herr».
- Adatg èsi da dar sch'i vegn dà avant ina limita fitg curta da reagir sco 24 u 48 uras ubain sch'i vegn fatg autramain squitsch – quai èn trics da cugliunaria.
- Er sbagls d'ortografia èn indizis sin cugliuns, per exempel na vegn il «ß» tudestg betg duvrà en Svizra.
- Ed avant che cliccar sin in link pon ins guardar cun ir cun il punctader da la mieur sur il link senza cliccar sche l'adressa dal link è la medema sco inditgà.
Dasper quests indizis sco agid datti dentant – tant tar la Posta sco er autras interpresas da pachets – ina varianta segira ch'eliminescha il ristg da vegnir cugliunà: Enstagl da cliccar sin il link ir directamain sin la pagina d'internet uffiziala e copiar en il code da tracking u da prender si contact via telefon, chat, u e-mail inditgà sin la pagina.