La gruppa cun il num «CAI – Content Autenticity Initiative» ha sviluppà in tool per guardar las metadatas d'ina fotografia. Pia las datas integradas, dentant betg vesiblas en la fotografia.
Cun agid da programs d'elavurar fotografias vegnan quellas datas integradas en la fotografia, e mussan tge ch'è vegnì fatg cun quella. Sche zatgi vul zuppar, che la fotografia è vegnida manipulada, e mida questas datas, u stizza ina part, vesan ins quai cun il tool da CAI.
Enfin ussa cumenzava questa registraziun e controlla pir cun la manipulaziun en il program. Il producent da cameras Leica ha sviluppà l'emprima camera, ch'ha integrà in chip, che signescha directamain ina fotografia, il mument ch'ella vegn fatga.
Questa signatura digitala vala quasi sco «certificat da naschientscha», e dat la pussaivladad da verifitgar la via da la fotografia, enavos enfin tar il «click» da la camera.