La dumengia vai puspè liber per il team grischun Calanda Broncos cun l'emprim gieu d'american football da la stagiun. Quest sport ch'è enorm popular en l'America – cun milliardas d'aspectaturs che guardan mintga onn il «Superbowl», il grond final da la stagiun – è er s'etablì en la Svizra.
Cun ils Calanda Broncos (oriundamain Landquart Broncos) è l'emprim club d'american football en il Grischun naschì l'onn 1991. Il club ha gì grond success dapi la fundaziun. Gia 12 giadas ha el gudagnà il Swiss Bowl, il campiunadi naziunal da la Svizra. Er l'onn 2023 èn ils Calanda Broncos daventads campiun svizzer.
Il sport è intensiv, fitg activ ed ha bler contact corporal. Ma il gieu plitost cumplex po irritar sin l'emprima egliada. Per sa semtgar per la stagiun da football dat RTR in'introducziun per novizs.
American football - Co funcziuna quai?
Il princip è simpel: Far dapli puncts che l'adversari. In pari n'exista betg tar quest sport. Ils teams giogan enfin ch'i dat in victur.
Co far puncts:
Puncts po in team far cun currer cun la balla («ov») en la zona finala da l'adversari a la fin dal plaz. Dumogna il team quai han els fatg in «touchdown» (6 puncts). Tar in «touchdown» ha il team la pussaivladad da far puncts supplementars cun sajettar la balla tras las stangas dal «field goal» (1 punct) u empruvar anc ina giada da traversar la zona finala (2 puncts). Il team dastga decider tgenina da questas opziuns ch’i vulan empruvar.
In'ulteriura pussaivladad è da far in «field goal» durant il gieu regular e betg suenter in «touchdown». Quel dat 3 puncts.
«Offense / defense»
Il gieu cumenza cun dus teams che stattan visavi in a l'auter tar la lingia d'amez. Mintgin dals teams ha dus blocs da giugadurs: in per la defensiun («defense») ed in per l'offensiva («offense»).
Cura ch'in team cumenza sia runda, trametta el sia offensiva sin il plaz. L'auter team ha ses giugadurs da defensiun sin il plaz. L'offensiva ha en l'emprima lingia la finamira da cuntanscher la zona finala da l'adversari cun la balla («touchdown»). Quai dat ils pli blers puncts.
Per purtar enavant la balla ha l'offensiva duas pussaivladads: bittar in pass en l'aria ad in congiugader u currer direct cun la balla enta maun direcziun zona finala da l'adversari. Il pli impurtant giugadur da la offensiva è il «quarterback». Quel coordinescha las acziuns ed el bitta era ils pass.
Il gieu vegn interrut suenter mintga acziun
Il gieu na vegn betg dà en in gir cuntinuant, sco per exempel ballape, mabain en rundas. L'offensiva ha mintgamai quatter schanzas per traversar minimum 10 yards. Quai correspunda circa a nov meters. Dumognan els quai, resta la balla tar quest team e quel survegn quatter novas schanzas. Ils giugadurs dastgan adina cuntinuar cun sias schanzas là, nua che la balla ha tutgà il funs. Sche l'offensiva na dumogna dentant betg 10 yards en las quatter schanzas, vegn midà direcziun. L'auter team po empruvar da rimnar puncts.
Sche in team na po betg propi vinavant pervi da la defensiun adversaria po el empruvar da sajettar la balla direct tras il gol rectangular e far in «field goal» (3 puncts). Dumogna la defensiva d'in team d'engular il pass or da l'aria u da terra suenter che l'offensiva perda la balla, mida la direcziun dal gieu.
Tge fa la defensiva?
La defensiva ha il pensum d'evitar che l'adversari vegn vinavant. Tegnair si l'adversari pon ils defensurs cun far il «tacklen». Quai munta: Far crudar il giugader cun la balla per terra.
A l’entschatta dal gieu vegn furmà ina lingia defensiva. La finamira è da construir in mir uschè ferm sco pussaivel cunter l’offensiva. Perquai èn ils giugadurs da la defensiva per regla ils pli ferms e massivs sin il plaz – radund 171 kilograms era il pli grev giugadur ch'igl ha dà.
Il star è coordinatur da la defensiva è il uschenumnà «middle linebacker» – er numnà il «quarterback da la defensiva». Dus auters «line backers» assistan el. Ils «linebackers» ston avair bleras abilitads. Betg mo esser ferms, mabain er fitg sperts ed agils.
Il sistem da fouls
Tar in foul na datti betg chastis da temp, sco en il hockey sin glatsch, u cartas sco tar il ballape. En l'American football datti chastis da distanza. Il team ch'attatga sto ir enavos intgins yards. Enstagl dals 10 yards drovi lura per exempel 20 yards per cuntinuar cun il gieu. Sche la «defense» fa in foul, dastga l'equipa ch'attatga vegnir pli datiers, tge che po muntar ch'igl han puspè quatter novas emprovas.
L'arbiter ha in entir sistem cun differents moviments per signalisar ils differents fouls. L’arbiter porta in microfon e commentescha il foul live durant il gieu per ils aspectaturs.
Spezial per il football american è era co l'arbiter interrumpa il gieu en cas d'in foul: El na dovra betg ina carta melna sco tar il ballape. Enstagl bitta el ina balla cun in bindel mellen («foul flag») sin il plaz. Quai bindel duai er gidar da marcar il lieu dal foul.
Or da l'archiv:
Il club Calanda Broncos ha gì bun success sur ils onns. Ma er ils clubs da football american per dunnas e per giuvens (U13) dals Calanda Broncos èn ferms. RTR ha adina puspè visità las differentas equipas e rapportà.
