La Societad da lutga engiadinaisa ha pudì inaugurar dacurt ses nov local da lutga a Ramosch. Quest nov local sa chatta a Plan da Muglin en ina gronda halla industriala. Sin l’emprim plaun sur las garaschas ha la societad da lutga pudì prender a fit in stupent local da trenament. Uschia pon ils giuvens lutgaders uss era trenar durant ils mais d’enviern.
Profis han mussà il sport ad uffants e giuvenils
En connex cun l’inauguraziun dal nov local da lutga da la Societad da lutga engiadinaisa han ins er envidà ils lutgaders Roman Hochholdinger da Favugn, Christian Biäsch da Tavau Sertig e Marc Jörger da Domat. Quest trio ha alura era fatg il trenament cun ina dunsaina giuvens lutgaders engiadinais. Il trio menziunà ha fatg cun ils giuvenils ils exercizis per sa stgaudar en, els han mussà differents svungs als uffants e giuvenils e per finir han els era fatg la lutga en il resgim a Ramosch. Far per ina giada in trenament cun uffants e giuvenils è per ils lutgaders da renum ina stupenta pussaivladad per dar enavos insatge al sport.
Ils trics pon ins duvrar tar la proxima lutga
La saira da lutga cun ils profis Roman Hochholdinger, Christian Biäsch e Marc Jörger è stada per ils giuvenils insatge tut spezial. I na capita numnadamain betg uschè savens ch'ins po trenar la lutga cun ils gronds e ferms. Uss vulan ils giuvenils duvrar quai ch'els han emprendì tar la proxima lutga. Per ils giuvens è quai la lutga da primavaira a Trimmis.