Sias emprimas experientschas en la liga naziunala A da hockey ha il giuven Federico Lardi fatg tar il Club da hockey da Tavau. Cun be 19 onns ha el pudì dar las emprimas partidas en la pli auta liga da hockey svizra. Il medem mument era Federico Lardi er giugader da l’elita A dal HCD. Perquai ch'il trenader Arno Del Curto aveva dentant sa decidì per auters giuvens giugaders ha Lardi bandunà il HCD en direcziun da Visp en il Valais. Là ha el emprendì d'enconuscher sia dunna, ed uschia ha el dà la gronda part da la carriera suenter sia premiera tar il HCD en il Valais, tar ils Langnau Tigers e tar Losanna, l’equipa da la svizra franzosa ch'è ussa l’adversari dal HCD en ils quartfinals.
A Tavau èsi fitg famigliar, a Losanna ston ins purtar prestaziun
Las differenzas tranter il Club da hockey da Tavau e Losanna èn grondas. Be gia ils lieus èn fitg differents. A Tavau enconusch’ins in l’auter. Tut è fitg survesaivel e famigliar. Tut auter a Losanna nua che l’anonimitad è bler pli gronda. Auter che a Tavau n'enconusch’ins betg ils giugaders sin via, dentant è il squitsch dals fans forsa anc pli grond che a Tavau. Dapi il 2019 gioga il Lausanne HC en il nov stadion ch'ha ina capacitad da 9’600 visitadras e visitaders. Là è l’euforia mintgamai gronda sch'il club da hockey da Losanna dat sias partidas.
Jau hai l’impressiun che Losanna è l’equipa pli constanta. Jau m’allegrel sche Losanna gudogna, dentant er sch'il HCD gudogna.
Federico Lardi prevesa ina seria stretga
Sco gia durant la qualificaziun èn era las partidas dal quartfinal tranter Losanna ed il HCD gieus fitg stretgs. Fin uss ha adina mo in gol fatg la differenza la finala. E stretg savess quai er ir vinavant. Tant Losanna sco er il HCD dattan tut per far il pass en la proxima runda. Losanna vul a la fin ina giada avanzar en in mezfinal. E Tavau avisescha, uss suenter ch'il grond midament en l’equipa è accumplì, il 32avel titel en l’istorgia.