Il BfU parta dal fatg che bun 5'200 persunas sa blesseschan per onn cun giugar hockey sin glatsch da laics. Tranter quests 5'200 blessads èn be 50 dunnas, il grond rest èn umens. En emprima lingia sa tracti da feridas da las spatlas e da la bratscha, quai surtut pervi dals checks en quest sport.
En cumparegliaziun cun quai chaschuna il ballape in dumber da blessuras bler pli aut, qua quinta il BfU cun bundant 75'000 accidents annuals. Questa auta cifra vegn chaschunada cunzunt perquai ch'il ballape è lunschor il sport da laics che vegn pratitgà il pli savens en Svizra.
Co ch'ins po prevegnir a blessuras
Prender avunda temp per stgaudar si il corp avant il sport ha in effect preventiv cunter bleras blessuras da l'apparat da moviment. Er s'occupar d'ina infrastructura uschè segira sco pussaivel da las plazzas da sport ed avunda recreaziun tranter ils trenaments sajan da gronda impurtanza en connex cun la prevenziun d'accidents. Ultra da quai recumonda il BfU d'adina purtar l'equipament da protecziun adattà e d'eventualmain adattar las reglas da gieu cun augmentar per exempel ils chastis en cas da checks nunfairs.
