A Schlarigna duai vegnir bajegada ina chasa cun 11 emprimas abitaziuns. Quest project è naschi pervi da mancanza da spazi d’abitar pajabel per indigens. Per dar cunterpaisa a questa problematica, è la vischnanca da Schlarigna sa decisa dad utilisar ina parzella entamez la vischnanca.
Ina concurrenza d’architectura ha evaluà co ch’il project duai vesair ora. Il project victur è dal biro d’architectura Ruch e partenari SA a San Murezzan. Durant l'ultima radunanza communala ha il victur da la concurrenza pudì mussar il project. Per pudair planisar uss, han ils votants e las votantas da Schlarigna approvà in credit da projectaziun sur 550’000 francs.
Jau sun fitg cuntent da la decisiun, perquai che quai è stà in grond obstachel. Ussa pudain nus cumenzar la segunda fasa.
Cumenzar uschè spert sco pussaivel
Ils custs per il project vegnan calculads cun set fin otg milliuns francs. Per quels raps duess vegnir fabritgà ina chasa cun elements da lain sin trais auzadas, ed ina garascha sutterrana. La raschun è che cun ils elements da laina èsi pussaivel da bajegiar pli svelt. E tenor ils responsabels, è quest tempo era giavischà. Cumenzar a construir vul ins la primavaira dal 2025.
